【意大利熱血球迷】攬文仙尼好過Anson Lo,Ciao!

·1 分鐘文章

【Now Sports】身邊同我一樣係熟女嘅朋友,家陣唔係想攬實姜濤就係Anson Lo,唔係話佢兩個唔好,但呢刻我最想攬住嗰個,叫文仙尼,好想同佢一齊喊。諗番轉頭,意大利3年前踢唔到世界盃,擺到明係俾成個阿伯咁款嘅(教練)雲度拉玩謝。型佬文仙尼一上台,幾年間就帶意大利重返強隊行列,睇見愛隊一開波就落後而捧盃,仲要連續兩場互射12碼贏,熱血沸騰,之前嘅唔開心一掃而空。

人哋等足55年再入決賽都贏唔到,我哋隊等15年就再贏大賽冠軍,賺咗。

邊個話男人喊係弱者,睇見文仙尼喜極而泣太感動,尤其係佢攬實球員生涯最佳拍檔維埃里,同埋因傷唔踢得,要用拐杖嘅主將史邊拿索拉(圖),我都眼濕濕。呢刻,相信所有意大利球迷都想攬埋一份。

最後多謝編輯老友搵我寫稿,如果你睇開呢個專欄,應該感覺到我係個悲觀主義者,覺得愛隊入4強就收貨,點估到成個賽事由頭到尾寫足7場,見證愛隊捧盃喜出望外。圓滿結局,預祝意大利出年世界盃再捧盃。有緣再見,Ciao!

撰文:Malena(燕飛)
現在我老了,人家才說「你很好」。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能