【專訪】維拉球迷Kidd:麥堅係關鍵

now.com 體育

【Now Sports】英超復季第一擊為阿士東維拉主場鬥錫菲聯,香港阿士東維拉球迷會會長Kidd So(Kidd)受訪時認為維拉護級形勢未明朗,而中場麥堅復出至為關鍵。

「(賽季)停咗咁耐,大家都唔知自己隊波水準去到邊,所以都需要時間去觀察,友賽都唔可以反映一切,你見我哋都贏李斯特城、熱刺都輸俾諾域治、曼聯都輸埋俾西布朗,所以需要時間睇睇。」Kidd認為此刻難以評估愛隊的護級形勢。 「隊波最近友賽踢得唔錯,好似對李斯特城嘅閉門友賽表現好,加埋中場麥堅復出,對維拉都係好消息。」他認為中場麥堅(John McGinn)復出舉足輕重:「佢復出令中場線侵略性更強。麥堅受傷後,隊隊都係keep住睇實加利殊就搞掂。麥堅強在攔截同後上切入能力較強。希望憑佢跑動帶動隊波。」 一直盛傳加利殊可能離隊,Kidd指出視乎護級成功與否。「加利殊友賽踢得唔錯,希望佢疫情期間走咗去玩冇影響佢,佢係我哋當然主力。報道話就算護級成功,佢都過硬曼聯,大前提係曼聯簽唔簽到山曹,簽唔到山曹就簽加利殊。但我覺得加利殊未必走,話晒係自己『家鄉球會』;當然如果護級失敗,就走硬;若成功護級,應該留低。」 說回周三之戰,Kidd有以下分析:「錫菲聯以打法硬淨見稱,咁我唔知疫情後對隊波有冇影響。當然站喺維拉球迷角度都希望佢哋有所影響,對維拉就容易啲踢,因為維拉都幾忌啲硬淨嘅波,上季英冠對錫菲聯都冇乜甜頭。」 「同埋要守住錫菲聯的死球戰術,其實都係英式踢法靠死球滾;維拉都幾驚一啲擅踢死球戰術嘅球隊,失好多波都係角球走甩對手,所以呢單要睇緊少少。」他續說。「呢場波都係重要賽事,如果停咗咁耐一復賽攞到3分,仲可以跳埋上安全線,好重要。」 Hong Kong Aston Villa Lions Club 香港維拉球迷會facebook: http://on.fb.me/1BrOByT 【英超】阿士東維拉VS錫菲聯 Now TV 621台18/06 01:00直播 Now E 同步直播

更多now.com體育新聞及英超、西甲精華,請按此

你可能還想看