【十三短打】送別淚人阿蘇

【Now Sports】剛過去呢晚，孫興慜流嘅係開心眼淚，蘇亞雷斯流嘅係痛心嘅淚，阿蘇咁樣結束世界盃征途，係可惜但無奈。
撰文：球十三蘇亞雷斯（ Luis Suarez）係好波之人，呢一點不在話下，只記得佢踢嘅每屆世界盃都畀大家留下深刻記憶。2010年烏拉圭殺入4強，真係強，而球迷唔會忘記佢8強對加納時門前用手擋波，救球隊但自己被趕出場，真係捨身成仁。係咪不君子？為國家邊諗得咁多，佢賽後話嗰球係「賽事最佳撲救」，義無反顧，呢啲叫真性。

到2014年，佢「代表作」肯定係分組賽對意大利用口咬基亞連尼，「咬人蘇」之名不逕而走，被重罰。但佢真係好波，就算惹惡名兼停賽，巴塞隆拿照簽佢，俗啲講，吹佢唔漲！

上屆決賽周，佢個人表現出色，喺分組賽對沙特阿拉伯攻入全場唯一入球，慶祝第100次為國家隊上陣，之後對東道主俄羅斯又施展百步穿楊。近屆決賽周罰球入波唔多，呢球係好波。

今屆，35歲嘅阿蘇老啦，但都好賣力，最後一場鬥老對手加納，今次冇出手啦，但就貢獻助攻。比賽尾段佢身在場邊，見拍檔卡雲尼禁區內俾人踢跌，佢非常肉緊，揚晒手似示意：球證唔即刻吹12碼都應該睇VAR啩……最終出線夢碎，見到佢用波衫遮住塊臉，淚水奪眶而出。

世界盃從此難再見阿蘇身影啦，球迷唔會忘記，佢曾喺呢個舞台為大家留下咁多難忘片段。

撰文：球十三
足球迷叫第十二人，冇偏愛，冷眼旁觀係十三。