【十三短打】無敵摩佬大戰「霸」王

【Now Sports】常言道紀錄係要嚟破,問題係,到底會係摩連奴歐戰決賽例不虛發,抑或係西維爾歐霸盃決賽100%勝率會被打破。
撰文:球十三摩連奴擺明係靠贏歐洲錦標起家,當年未執教車路士前,率領波圖連贏歐協盃(歐霸盃前身)同歐聯已經響晒朵。之後佢帶領國際米蘭圓3冠王霸業、就算喺曼聯唔多成功都總算贏到歐霸。去季執掌羅馬,一隊近年喺意甲甚至談唔上爭標份子嘅褪色名牌,好多人認定摩佬難有作為,點止又教得唔錯,舊年先贏歐協聯,家陣又「升級」入歐霸盃決賽,唔怪得羅馬球迷嗌佢做King!

摩佬縱橫球壇咁多年,載浮載沉到依家都只係六十歲,以教練嚟講仲大把世界,假如佢喺歐洲賽呢個「地盤」再威多次,早幾年失意就一掃而空。「對手踢歐霸決賽係等閒事,我哋就天大嘅事;對手踢歐洲賽決賽只係好似踢本土比賽,我哋就係歷史性。」佢不嬲都深懂言語藝(偽)術,呢番口術都幾有意思,唔知可唔可以消弭西維爾嘅「霸」者威力。

係㗎,歐霸盃另一個名稱係「西維爾盃」,鬼咩,紀錄性6次封王係架勢,上兩圈贏曼聯、祖雲達斯堅勁。特別留意浪人教練文迪列巴,有機會好似當年摩佬咁藉呢個賽事響朵。摩佬係球壇精算師,千算萬算,因住算漏呢位行家至好。

撰文:球十三
足球迷叫第十二人,冇偏愛,冷眼旁觀係十三。

【歐霸】西維爾VS羅馬
Now TV 643台01/06 03:00直播
Now TV 613台4K直播
Now E 同步直播