【十三短打】打殘Big 6!白禮頓,抵你踢歐霸!

【Now Sports】白禮頓打和曼城,正式確認前6名來季參戰歐霸盃,一支今季由頭到尾表現平穩,遇強愈勇嘅異軍,實在值得呢個連熱刺、車路士都得個「睇」字嘅資格。
撰文:球十三先淨係講呢場波,有睇嘅一定同意曼城並唔係完全hea,而白禮頓面對擂台躉保持今季遇強愈強特質,加埋主場謝幕嘅動力踢咗一場好波,面對曼城全場20次射門,過去兩年半,冇任何英超球隊做得到。

曼城嘅連勝走動,亦係由白禮頓煞停。

拉闊成季嚟講,打從開咧戰作客砌低曼聯,令人家新帥坦夏碰到一臉子灰,為今季打殘Big 6揭開序幕;代表作包括最終雙殺曼聯、車路士,仲炒利物浦同阿仙奴3蛋,以一支嚴格嚟講連中型班都未談得上嘅球隊,勁到癲!

講到勁,亞洲人當然特別留意三笘薰,日本人出晒位不在話下,但能夠躋身前6點會得一個勁,麥卡里士打、哥斯甚至老將韋碧克都交到貨。BBC有個數據好值得注意,係今季英超至今有20個由小將入波,有11球嚟自白禮頓(19歲嘅安斯素、18歲嘅艾費格遜同埋保拿洛迪),證明隊波重用新人,新人亦不負所託。

講到奇兵,賓福特下半季好似弱咗少少,阿士東維拉發力較遲,冇辦法唔俾季初到季尾水準都穩嘅白禮頓騎住。

家陣進軍歐洲,領隊迪些比講到明應付4條戰線要買球員,係嘅,太多往績話畀大家聽類似異軍緊接進軍歐洲,隨時兼顧唔嚟,只希望白禮頓係異數,繼續打殘強隊,繼續重用小將。

多幾隊好似今季嘅白禮頓,英超至更好睇。

白禮頓今季鬥Big 6代表作
主和曼城1:1
客勝阿仙奴3:0
主勝曼聯1:0
客勝車路士2:1
主勝利物浦3:0
主勝車路士4:1
客和利物浦3:3
客勝曼聯2:1

撰文:球十三
足球迷叫第十二人,冇偏愛,冷眼旁觀係十三。