【十三短打】修夫基,點解要小將承受你嘅痛?

·2 分鐘文章

【Now Sports】好好哋,諗極都諗唔通,點解修夫基有咁嘅戰術同人腳安排。
撰文:球十三英格蘭互射12碼飲恨,網民幾乎一面倒質疑修夫基嘅領軍功力,包括領先下戰術過份保守,太遲調動,而臨尾至換入準備射12碼嘅華舒福同山曹,太冒險啦。佢兩個企場邊等咗陣,當時一直係生波,我甚至擔心佢趕唔切換入場,笑咗。

強如「白比利」薛高,喺1986年世界盃對法國一出場博得12碼,跟手操刀都宴客。叫得人射12碼,係咪畀多少少時間掂多幾個波至主踢?尤其係佢兩個今屆都係後備,睇多過睇,忽然委以重任,壓力千斤重。薩卡今屆表現唔錯太後生,守尾門射第5球真係啱數?被換走嘅佐敦軒達臣係咪應該留低踢埋?

呢3個宴客英兵,年紀最大係23歲嘅福仔,從此要擔起決賽主場倒灶,射失12碼嘅罪名。修夫基當年之痛成為佢哋嘅痛,信心受打擊,未來日子唔易過。福仔係曼聯主將,山曹係準紅魔,蘇斯克查真係多得修夫基唔少。

不過,十三都唔忍心再踩修夫基,話晒佢呢幾年帶隊唔差,賽後又話肯承擔責任,點計,都仲係個球場好漢。

撰文:球十三
足球迷叫第十二人,冇偏愛,冷眼旁觀係十三。
email:ballthirteen@hotmail.com
歡迎瀏覽球十三fb專頁,若得到波友一個like,就是我們團隊的一大鼓舞:
www.facebook.com/ballthirteen

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能