高海寧慘變豆腐Ling 馬國明輕鬆談情

高海寧一改戲路,希望以打女形象給觀眾新鮮感。
高海寧一改戲路,希望以打女形象給觀眾新鮮感。

高海寧(高Ling)、馬國明與黎諾懿合演新劇《C9特工》,首次拍打戲的高Ling拍攝不久便受傷送院,加上每場動作戲都幾乎受傷,打女Ling慘變「豆腐Ling」!黎諾懿拍打戲則應付自如,偏偏在文戲中受傷;至於馬國明最安全,只負責談情戲。

由高Ling、馬國明及黎諾懿等主演、梁耀堅監製的無綫新劇《C9特工》,於本月21日起晚上9時30分在無綫翡翠台播出。高Ling於劇中有雙重身份,既是一名師奶,同時又是特工。原本她跟演菜販的馬國明過着幸福生活,但因前特工拍檔黎諾懿出現,她被迫重操故業。劇情輕鬆溫情,有笑有淚有緊張情節。

黎諾懿拍文戲受傷

監製大讚高Ling有突破,打破以往的靚女形象,飾演小女人。在特工戲中,高Ling堅持親身上陣演大部分動作戲,非常拚搏!她表示開拍首星期已受傷送院:「當日喺街市拍攝,我企喺個菜籮入面,下面係塊滑板,試戲時冇問題,但正式拍我成個人跌低,Pat Pat同後尾枕落地,要Call白車送院,照咗腦同驗咗眼冇事,不過之前睇嘢會有重影,依家已經好番好多。」又指今次是她首部打戲,當時完全不懂得保護自己,加上太多事情要兼顧,所以甚為吃力。

同樣飾演特工的黎諾懿亦有大量動作戲,他說:「當時連續兩套劇都要打,身體狀態幾好,而且我之前參加咗武打藝員進修班,所以動作戲可以自己做番。」不過他亦有受傷,但與動作場面無關:「我拍文戲時,唔小心撞到塊板,撞爆眉心。」他坦言戥高Ling辛苦,但不忘取笑對方:「我哋改咗佢個花名叫『豆腐Ling』,因為佢做所有動作都會整親,就算趴落地都會損,但以一個唔係成日打嘅女仔嚟講,佢做得好好。」

女神傻得可愛

至於演街市菜販的馬國明自言喜歡貼地角色,讓觀眾更有親切感,但亦恨做特工:「特工拍出嚟好有型,好似諾懿咁,無時無刻都好型,即係做番佢自己,佢係最接近神嘅男人,但佢唔可以好似我咁Free,着到爛撻撻咁。」他指高Ling真人與師奶角色相似:「佢表面上係性感女神,識落佢傻更更好可愛。」又讚對方專業,拍攝受傷也沒有請假。

【相關搜尋】高海寧狠摑江疏影

雖然唔使拍打戲,但馬國明都有「跑到氣咳」的鏡頭。
雖然唔使拍打戲,但馬國明都有「跑到氣咳」的鏡頭。
黎諾懿與高海寧演特工,二人均親身上陣拍動作戲。
黎諾懿與高海寧演特工,二人均親身上陣拍動作戲。
黎諾懿揸槍有型有款。
黎諾懿揸槍有型有款。
馬國明玩新Look,紮辮同高海寧談情。
馬國明玩新Look,紮辮同高海寧談情。