欣宜加盟寰亞 老闆送兩車食物

欣宜加盟新公司,未有透露簽約年期,指是「開心價」。
欣宜加盟新公司,未有透露簽約年期,指是「開心價」。

歌手鄭欣宜昨日正式加盟寰亞,獲公司舉行盛大記者會,並邀重量級主持鄭裕玲(嘟嘟)擔任司儀,老闆林建岳送上兩大購物車的食物。欣宜坦言現時能簽到公司及獲支持出歌拍MV,感謝對其重視,提到「賣身契」年期及身價,她笑言是開心價:「我一直都係一個人住,都要時間去培養先成為家人,總之我係好開心。(有兩車食物已開心?)係呀!你睇我幾易滿足。」

欣宜又表示公司主動提出可安排她拍戲及拍劇:「我對自己都冇乜信心,但佢哋睇到我呢方面潛質,希望各方面都嘗試。記得一簽完約就帶我去演唱會部門,我話唔心急開騷,啱啱推出新歌,等我再儲吓歌先。」自爆最感動是嘟嘟在其耳邊說了句「You done so well!」打氣:「一個咁能幹、我敬佩嘅人咁留意我同讚我,我要更加努力。」

至於嘟嘟指欣宜是香港人的集體回憶之一,因為大家都是由細看着她長成,替對方簽約新公司而開心:「佢好乖冇變壞,識唱歌跳舞又開騷又拍戲,依家做埋網紅,叻過我。」

林建岳、陳淑芬及鄭裕玲齊為欣宜打氣。
林建岳、陳淑芬及鄭裕玲齊為欣宜打氣。