城巴被指發告示 提醒車長睇世界盃後「返工勿射波」 濫用病假可致即時解僱

圖:討論區「香港交通・資訊網」
圖:討論區「香港交通・資訊網」

四年一度的世界盃賽事正如火如荼進行,香港跟卡塔爾都有 5 小時時差,部分賽事都要去到本港時間凌晨時分才會開始,如要實時觀看就難免要「捱更抵夜」,犧牲睡眠。有網民今日就在公共交通討論區「香港交通‧資訊網」發帖,表示有車長通訊群組流傳一張城巴告示,提醒員工「睇波樂趣多 返工勿射波」,如果被發現濫用病假可招致「極嚴厲處分」,「包括即時解僱」。不過不少網民都質疑,到底巴士公司可以採取甚麼措施,檢視員工請病假是否涉及濫用。

該張告示指,公司現正密切監察濫用病假情況,「每一張病假紙均由經理級員工詳細審視」,如果被發現濫用,將會被處分。對於告示,有網民就問,「呢間公司除咗麻煩多,就是經理多」;之後又有網民問,「經理嘅假紙邊個睇?」。

對於告示指經理級員工會詳細審視病假紙,就有網民好奇指,「想知城巴憑咩去質疑由醫生發出嘅醫生紙」;「點樣詳細審視法!?經理識睇症!?」亦有網民疑問指,如果是政府醫生發出的病假紙,巴士公司的經理是否都有權不承認。另外又有網民說,公司應該嘗試打給醫生,「唔係好困難」,但隨即有網民反駁,「唔通醫生話『係呀佢詐病,叫我開張醫生紙俾佢』?」

有網民就講笑指,巴士公司應該是「請咗(醫衞局長)盧寵茂做高層,話你假就係假」、「撤銷埋張假紙都仲得」、「呢度唔係法庭,唔需要證據,我對眼就係證據」、「有一種能力叫『我話係就係』」。

另外,又有網民打趣指,「睇波唔射波,睇嚟幹什麼」;有網民又認為,請假都不是全無道理,「唔射波,疲勞駕駛,仲危險」,「琴晚失眠,第二日都仲去返工,經理你讚唔讚我加唔加我人工呀?」,提醒乘客近期要多加注意車長狀態。

汽車交通運輸業總工會城巴分會主任梁暖銳接受香港 01 查詢時表示,已向管理層確認,此通告確實由城巴管理層發出。